Туфахија е вид на сладок десерт, по потекло од Персија. На Балканот ја донеле Турските освојувачи, а ние имаме обичај да кажеме дека тоа е босански специјалитет, затоа што најчесто таму се прави. Туфахија е колач од варени јаболки филувани со ореви.
Обично се употребува златен делишес, некоја средна големина. Оваа сорта на јаболка најдобро "го поднесува" варењето, не се распаѓа.
Вообичаена количина е по една туфахија по човек.
За 8 туфахии ми беа потребни:
- 8 јаболки- 600 мл вода
- 400 - 450 гр шекер
- 150 гр ореви мелени
- 100 гр кекси мелени
- 2 кесички ванилин шекер
- 1 лимон
Јаболките добро се мијат, се лупат и кората се остава на страна, а средината се вади, и се прави дупка по целата должина на јаболката.
Во тенџере се става водата со половина количина на шекер, 1 ванилин шекер и сок од 1 лимон. Кога ке зоврие, ги ставаме јаболките и ги вариме по 5-7 мин секоја. Повремено се вртат ако не се цели потопени во вода, за да омекнат рамномерно. Не смеат да се преварат, ке се распаднат. Треба да останат малку тврди за да ја задржат формата. Се вадат од тенџерето и се оставаат да се оладат. Во тенџерето се додава останатиот шекер, корите од јаболките и се остава да врие уште 15 мин да се добие густ шербет.
За тоа време се прави филот:Оревите и кексите се мелат и се мешат, им се додава кесичка ванилин шекер (јас додадов и ликер од бадем). Мешавината се попарува со шербетот во кој се вареле јаболките. По желба се додава и шекер, ама треба да се внимава дека се мешаат со шербет, да не биде филот пресладок.
Секоја јаболка добро се полни со филот, треба да има мнооогу фил во нив. Се оставаат да се оладат добро пред послужување. Повремено се поливаат со шербетот за да останат сочни
Пред сервирање се украсуваат со шлаг.
Јас ставив и вишна од слатко. И ги посипав со мелени ореви и какао.
Секако, може да се сервира и на тањири, по желба.
Ваш коментар:
