Шарени јајца

Секој знае како се фарбаат јајца, јас само можам да набројам неколку техники на фарбање, посебно ако бојата не ви се погодила или ако јајцата пукнале при варење :))














1. Фарбање со кромид

Според мене, ова се најубавите јајца. Со мермерни шарки, во сите бои.

Ви требаат лушпи од кромид, во кои ке ги завиткате јајцата пред варење.

Секое јајце убаво се завиткува со лушпи и се става во некоја тенка најлонска чорапа и убаво се врзува.

Така завитканите јајца се ставаат во тенџере и се варат стандардно, со боја. Најубави се кога се офарбани со зелена боја или плава, затоа што кромидот сам по себе пушта црвена и жолта боја.

Кога ке се сварат, се одвиткуваат од лушпите и секое јајце е различно, со прекрасни шарки.








2. Украсување со салвети http://www.marthastewart.com/266278/decoupage-eggs-revived

За оваа техника се потребни хартиени салвети или прецизно исечени орнаменти од салвети.

За лепење се користи изматена белка од јајце и четка.

Се мачка јајцето со белка и се лепи салветата и пак се премачкува со белка.
Ова се примери како изгледа кога се лепи само еден орнамент.

Ако лепиме по целата површина на јајцето се сечат поголеми делови, не е страшно и ако се поклопат, со премачкување на белката ке се залепат убаво.

Вака изгледаат јајцата кога целите ке се залепат со салвети.
Се оставаат да се исушат добро и на крај можат да се премачкаат со зејтин како и сите останати јајца.





3. "Изгребани" јајца

Многу интересно изгледаат јајцата што нежно сте ги изгребале со жица за миење садови. Ова е добро решение за јајцата кај кои бојата не испаднала добро и имаат флеки, па не знаете како да ги решите.


4. Испрскани јајца

И оваа техника ги спасува јајцата што имаат флеки па не изгледаат убаво кога се еднобојни. На фарбаното јајце попрскуваме некоја контрастна боја директно од кесичката и го "тркаламе" меѓу дланките, нормално со ракавици (најубави се оние што ви останале од фарбање на коса :))  Кога добро ке се исушат боите, земете една малку влажна салвета и нежно поминете преку јајцето, да се одстрани вишокот на боја. Овие јајца пуштаат малку боја кога ке ги лупите.

5. Седефасти јајца

Убаво изгледаат, имаат убав сјај, малку метален, и добри се за прикривање на пукнатини и флеки.
Се фарбаат со специјалните седефасти бои што ги има секаде каде што се продаваат и обичните.




На крај секое јајце убаво намачкајте го со зејтин и нежно избришете го со хартиена салвета, така ке има убав сјај.

---

Ваш коментар: