Праските се идеално овошје за оваа крем торта, но сигурна сум дека резултатот ќе биде прекрасен и со вишни или некое друго овошје кое можете да го најдете замрзнато во зимскиот период.
За бисквит тестото потребно е:
60 гр путер (или маргарин)
60 гр шеќер
1 јајце
80 гр брашно
5 гр прашок за пециво
трошка сол
За кремата:
130 гр шеќер
½ литар млеко
½ литар слатка павлака (по можност не растителна и со 35% масленост)
150 гр брашно
4 јајца
рендана кора од лимон
И уште: неколку меки Амарето бисквити или друг вид мек бисквит (може и коцкички пандишпањ) - овој дел не е задолжителен
400 гр праски или друго овошје
Постапка:
Путерот, кој сте го оставиле на собна температура да омекне, изматете го со миксер заедно со шеќерот се додека не добиете кремаста смеса. Потоа додајте го јајцето, брашното со прашокот за пециво и трошка сол.Најдобро е да користите калап за торта со дијаметар од околу 22цм со обрач кој се отвара. Ставете хартија за печење само на дното, а рабовите на калапот измачкајте ги со путер и посипете со брашно.
Смесата за бисквит истурете ја на дното на така припремениот калап и добро израмнете ја површината. Печете околу 30 минути на 150°С.
Во меѓувреме подгответе ја кремата: Загрејте го млекото и шеќерот во едно тенџерче се додека шеќерот не се стопи. Во друг сад добро измешајте го брашното со слатката павлака и полека додавајте го на загреаното млеко, не престанувајќи да мешате со маталка за да не се згрутчи. Продолжете да ја варите кремата на многу тивок оган уште 5-6 минути додека не се згусне, со постојано мешање. Оставете ја да се излади малку, потоа додајте ја ренданата кора од лимон, јајцата едно по едно, добро измешајте и на крај додајте ги праските излупени и исецкани на коцки (оставете една за декорација).
На испеченото бисквит тесто изронете ги меките бисквити или коцкици пандишпањ и врз нив истурете ја кремата која во меѓувреме се изладила. Печете повторно на 150° се додека кремата не биде целосно печена (тоа ќе го проверите со чачкалица), околу 40 минути.
Оставете ја тортата да се лади во фрижидер неколку часа, потоа извадете ја од калапот и украсете ја по желба со преостанатата праска и трошки од бисквитот кој го издробивте и во тортата.
Ваш коментар:
